F’isem il-Kumitat nixtieq nirringrazzja lill-membri kollha li matul dan l-istaġun għoġobom jissieħbu mal-klabb u mas-sistema DOC għax permezz tagħhom għal darb’oħra żammejna isem pajjiżna fil-għoli meta għat-tieni sena konsekuttiva ġejna uffiċjalment rikonoxxuti bħala l-akbar Supporters Club Juventin barra mill-Italja fid-dinja kollha.

Meta sena ilu lħaqna dan ir-riżultat għall-ewwel darba b’780 tesserat ma’ Juventus, kont għidt li: Li tirbaħ qatt ma huwa faċli. Iżda huwa ferm aktar diffiċli li tirrikonferma rebħa sena wara sena. Mhux talli flimkien, erġajna rbaħna, talli żidna 404 membru mas-780 tas-sena l-oħra biex tlajna għan-numru sabiħ ta’ 1,184 membru DOC. Dan huwa rekord assolut fil-gżejjer Maltin u meta tikkunsidra li fil-preżent, fil-Gżejjer Maltin jeżistu 4 klabbs uffiċjalment rikonoxxuti, tifhem kemm ir-riżultat tal-lum huwa wieħed importanti.

Ilħaqna dawn in-numri f’inqas minn 5 snin u ġejna ddikjarati l-akbar klabb Juventin barrani eżattament xahar wara l-ftuħ tas-sede l-ġdida. Sede li ġimgħa wara ġimgħa, logħba wara logħba, dejjem qed tkun ippakkjata b’ħafna membri li jagħżlu li jiġu mal-partners, mal-familja u mat-tfal. U huwa proprju dak il-messaġġ li huwa ta’ importanza kbira għalina. Is-sens ta’ familja kbira, familja Juventina.

Kull min żar il-klabb seta’ jara b’għajnejh u jmiss b’idejh l-investimenti kbar li saru biex il-post joffri l-aqwa esperjenza Juventina possibbli. Kurrenti kontrina sibna wkoll u żgur se nibqgħu nsibu iżda konvint li bl-għaqda u s-sinerġija li tirrenja fi ħdan il-Kumitat dawn l-ostakli dejjem se naqbżuhom.

Nagħmlu dan kollu filwaqt li nżommu l-Membru bħala ċ-ċentru ta’ kollox. Naraw kif se noffrulu servizz aħjar u kif se nassistuh bl-aqwa mod possibbli. Nippruvaw li l-ispejjeż li jiltaqa’ magħhom il-klabb ma jbatihomx il-Membru u sena wara sena dejjem qed jirnexxilna nimxu f’din id-direzzjoni.

Fix-xhur li ġejjin se nħabbru żewġ inizjattivi kbar li għal darb’oħra se jpoġġuna l-ewwel f’dawk li huma ideat ta’ klabbs mhux biss lokalment iżda nasal ngħid globalment. Iżda aktar informazzjoni dwar dawn aktar ‘il quddiem.

Nixtieq minn qalbi nirringrazzja lil kull wieħed u waħda minnkom! 1,184. Intom għamiltu dan ir-riżultat. Intom għamiltu għal darb’oħra lill-JCMCB l-akbar Juventus Club barrani fid-dinja. Nistedinkom tibqgħu tattendu għall-attivitajiet imħejjija għalikom ġewwa l-klabb u li tkomplu xxerrdu l-kelma dwar il-klabb tagħna biex nibqgħu nikbru aktar flimkien.

Grazzi
Omar Busuttil
President
Juventus Club Malta Cuore Bianconero

Il-klabb qed jaħseb fi proġetti li jistgħu jagħtu prominenza nazzjonali lil dawk li jipparteċipaw fihom. Għalhekk, jekk tixtieq tappoġġja lill-klabb permezz ta’ sponsor, agħmel kuntatt magħna fuq info@juventusmalta.com.

Tixtieq tkun kontributur tas-sit juventusmalta.com u tibda tikteb l-artikli magħna? Agħmel kuntatt fuq admin@juventusmalta.com