Għadda iktar minn xahar minn meta Gianluigi Buffon iddeskriva l-akkwist ta’ Wojciech Szczęsny bħala “żwieġ intelliġenti”. F’dak il-punt kulħadd ħaseb li l-akkwist ta’ Szczęsny kien lest, iżda fiż-żmien li għadda mingħajr ma ssemma xejn wieħed seta’ saħansitra jaħseb li din it-trattattiva kienet sfaxxat fix-xejn.

Madankollu, jidher li n-negozjati waslu fi tmiemhom, u wara li tħabbar uffiċjalment l-akkwist ta’ Douglas Costa, sa għada Szczęsny għandu jkun Juventin.

Il-ftehim bejn il-plejer u l-klabb ilu li ntlaħaq, kemm fuq livell ekonomiku kif ukoll fuq livell tekniku. Dan ifisser li l-kuntratt se jkun ta’ erba’ snin li matulhom il-Pollakk se jkun qed jaqla’ erba’ miljuni fis-sena filwaqt li se jkun hu li jieħu post Buffon meta dan jirtira.

Jidher li ma’ Arsenal intlaħaq ftehim ta’ €10 miljun, meta wieħed iqis li l-kuntratt ta’ Szczęsny mal-Gunners se jintemm is-sena d-dieħla u Wenger m’għandu l-ebda interess li jżommu ma’ Arsenal.

Jekk kollox imur kif previst, Szczęsny għandu jibda jitħarreġ ma’ sħabu fil-jiem li ġejjin biex il-Ħamis ikun jista’ jitlaq mal-kumplament tat-tim għat-turnew fl-Amerka.

Sors: Tuttosport

Il-klabb qed jaħseb fi proġetti li jistgħu jagħtu prominenza nazzjonali lil dawk li jipparteċipaw fihom. Għalhekk, jekk tixtieq tappoġġja lill-klabb permezz ta’ sponsor, agħmel kuntatt magħna fuq info@juventusmalta.com.

Tixtieq tkun kontributur tas-sit juventusmalta.com u tibda tikteb l-artikli magħna? Agħmel kuntatt fuq admin@juventusmalta.com