Wara r-rebħa sodisfaċenti f’nofs il-ġimgħa kontra Porto, Juventus jirritornaw fl-azzjoni nhar is-Sibt li ġej f’logħba valida mill-Kampjonat ġewwa l-Juventus Stadium kontra Empoli.
Biex jispiċċa l-kampjonat baqa’ biss 13-il logħba, għalhekk Juventus li jinsabu seba’ punti vantaġġ fuq Roma, se jkunu qed ifittxu biex jibqgħu għaddejjin bir-ritmu li qabdu bħalissa. F’dan l-artiklu se nkunu qed nosservaw u nsegwu xi fatti u figuri fuq Juventus u anke fuq l-avversarji Empoli.
-> Preżentement wara 25 partita Juventus jinsabu fl-ewwel post fil-klassifika bit-total ta’ 63 punt filwaqt li Empoli jinsabu fis-17-il post bi 22 punt. Għalkemm jinsabu f’dik il-pożizzjoni xorta waħda qegħdin komdi u ’l bogħod miż-żona l-ħamra għaliex jinsabu tmien punti fuq Palermo.
-> Juventus huwa t-tielet l-iktar tim li sab ix-xibka fis-Serie A filwaqt li Empoli għandhom difett fl-attakk wara li huma l-inqas tim li sabu x-xibka b’total ta’ 15-il gowl biss.
-> Il-Bianconeri bl-aqwa difiża fil-kampjonat fejn sofrew 17-il gowl biss filwaqt li Empoli sofrew 35 gowl minn total ta’ 25 partita.
-> Minn 25 partita, Juventus 12 minnhom, bejn wieħed u ieħor kwazi nofs il-logħob, żammew clean sheet filwaqt li l-avversarji żammew clean sheet għal 10 partiti. Huwa total tajjeb ħafna fl-opinjoni tiegħi għal tim bħal Empoli.
-> Statistika rigward il-ħinijiet li huma rinomati li jiskurjaw fihom turina li Juventus iħobbu jiskurjaw l-iktar bejn is-siegħa logħob u l-75 minuta b’total ta’ 24.5% filwaqt li għal Empoli hemm bilanċ assolut għax mit-30 sas-60 minuta u bejn il 75 u 90 minuta għandhom l-istess persentagg ta’ 20%.
-> L-ikbar rebħa f’dan l-istaġun għal Juventus kienet reġistrata kontra Cagliari bl-iskor ta’ 4-0 filwaqt li għal Empoli kienet bl-istess skor identiku kontra Pescara.
-> L-Arġentin Gonzalo Higuaín huwa l-aqwa skorer għat-tim ta’ Juventus u anke huwa t-top scorer fis-Serie A b’total ta’ 19-il gowl filwaqt li l-aqwa scorer għal Empoli huwa l-Ġeorġjan Mchedlidze b’total ta’ 5 gowls.
-> Il-konfront tal-ewwel rawnd bejn dawn iż-żewġ timijiet kien intemm bl-iskor ta’ 0-3 favur Juventus. Il-gowls ġew skurjati minn Paulo Dybala u doppjetta tal-prolifiku Gonzalo Higuaín.
Il-klabb qed jaħseb fi proġetti li jistgħu jagħtu prominenza nazzjonali lil dawk li jipparteċipaw fihom. Għalhekk, jekk tixtieq tappoġġja lill-klabb permezz ta’ sponsor, agħmel kuntatt magħna fuq info@juventusmalta.com.
Ħalli Kumment