Hekk kif il-futbol femminili qiegħed jikber madwar l-Ewropa, fosthom f’pajjiżi bħall-Italja u l-Ingilterra, wieħed jibda jistenna li t-timijiet popolari li naraw kull weekend fuq it-televiżjoni, jibdew iħaddnu l-kultura tal-futbol femminili huma wkoll.

F’dan il-qasam, Juventus mhux ħa jibqgħu eċċezzjoni għaliex kif ħabbru lbieraħ fuq Twitter, ħa jkunu qegħdin jipparteċipaw fil-kampjonat Taljan mill-istaġun li ġej.

Għalkemm dettalji għadhom ma ngħatawx, wisq probabbli se jkunu qegħdin jipparteċipaw fis-Serie B, kampjonat li huwa maqsum f’erba’ gruppi skont ir-reġjuni fejn fost l-oħrajn insibu timijiet bħal Lazio, Napoli, Milan u Inter.

Intant, il-kampjonat tas-Serie A dan l-istaġun ġie mirbuħ mit-tim ta’ Fiorentina, li waqqfu d-dominju ta’ Brescia u saħansitra anke għelbuhom fil-Coppa Italia, biex b’hekk għamlu doppjetta u issa se jkunu qegħdin jirrappreżentaw lill-Italja fil-UEFA Women’s Champions League, l-ogħla kompetizzjoni fil-futbol tan-nisa fuq livell ta’ klabbs.

Sadanittant, it-tim ta’ Juventus kien diġà qed jaħdem mat-tfajliet għaliex riċentement waqqfu l-gruppi għall-etajiet żgħar, li kienu l-Pulcini Calcio Femminile, Esordienti Calcio Femminile u l-Giovanissimi Calcio Femminile.

Il-klabb qed jaħseb fi proġetti li jistgħu jagħtu prominenza nazzjonali lil dawk li jipparteċipaw fihom. Għalhekk, jekk tixtieq tappoġġja lill-klabb permezz ta’ sponsor, agħmel kuntatt magħna fuq info@juventusmalta.com.

Tixtieq tkun kontributur tas-sit juventusmalta.com u tibda tikteb l-artikli magħna? Agħmel kuntatt fuq admin@juventusmalta.com