Hekk kif illejla jiddebutta t-tim nazzjonali Taljan fl-Euro 2016 bil-preżenza ta’ 6 plejers Juventini fl-iskwadra, nagħtu ħarsa lejn il-Bianconeri l-oħra fit-timijiet nazzjonali rispettivi tagħhom fl-ewwel logħbiet tal-kampjonat Ewropew.

Evra: Minkejja x-xogħol tajjeb fil-fażi tal-attakk speċjalment bid-djalogu ma’ Matuidi, kien kemxejn mifxul fil-fażi difensiva bil-gowl tad-draw tar-Rumanija jasal anki minn fawl li għamel fuq Stanciu.

Pogba: Dak li qed jitqies bħala wieħed mill-istilel tat-turnew u l-istilla assoluta ta’ Franza kellu debutt kemxejn diżappuntanti b’mumenti waqt il-logħba li fihom deher mitluf u mhux il-plejer li mdorrijin naraw ma’ Juventus. Minħabba dan, Deschamps biddlu ma’ Martial fis-77 minuta.

Lichtsteiner: Kien jidher kemxejn nervuż u fawl li għamel seta’ sewa penalti lit-tim Żvizzeru. Kellu assist tajjeb lil Dzemaili fil-bidu tal-logħba imma mhux wisq iktar.

Mandžukić: Għamel logħba tajba ħafna tant li kien l-aħjar attakkant li kellhom il-Kroazja. Kellu wkoll numru t’assists tajbin waqt il-logħba. Ħalla postu lil Pjaca fit-93 minuta.

Khedira: Prestazzjoni mill-aqwa tal-midfielder Juventin tant illi kien jonqsu biss il-gowl. Preżenza qawwija f’nofs il-grawnd, inserimenti preċiżi u konklużjonijiet. Probabbilment flimkien ma’ Neuer l-aqwa plejer tal-Ġermanja fid-debutt tagħhom.