Imwieled f’Zadar, fil-Kroazja, il-goalkeeper ta’ Monaco Danijel Subašić beda l-karriera kalċistika tiegħu f’pajjiżu ma’ Zadar u Hajduk Split. Fl-2012, wara għaxar snin fil-Kroazja, hu ngħaqad ma’ Monaco, li f’dik is-sena kienu għadhom fil-Ligue 2. Minn dakinhar, Subašić lagħab 191 darba mat-tim Franċiż, fosthom fiż-żewġ logħbiet tal-kwarti tal-finali tal-UEFA Champions League kontra Juventus f’April ta’ sentejn ilu.

Issa li reġa’ wasal biex jiltaqa’ mal-Bianconeri, Subašić jista’ jiftaħar li f’din l-edizzjoni taċ-Champions League s’issa qala’ inqas gowls mill-goalkeeper ta’ Real Madrid, Keylor Navas (13 u 14 rispettivament). Dan minkejja li d-difiża ta’ Monaco mhijiex eċċellenti, kif se nkunu qed naraw iktar ’il quddiem. Fil-fatt, spiss kellu jsalva lit-tim tiegħu b’interventi sbieħ, bħalma għamel b’ħarġiet fuq Sergio Agüero fl-ottavi tal-finali.

Il-goalkeeper ta’ 32 sena lagħab anki 24 logħba bil-flokk tat-tim nazzjonali Kroat. Matulhom huwa magħruf għall-penalty deċiżiv ta’ Sergio Ramos li laqa’ f’partita tal-Euro 2016 li l-Kroazja għelbu lil Spanja bl-iskor ta’ 2-1.

Fatt interessanti ieħor dwar Subašić hu li f’dan l-istaġun fil-Ligue 1 sofra gowl kull 107 minuti meta kkumparat mal-goalkeepers ta’ PSG li bejniethom qalgħu gowl kull 133 minuta.

Tajjeb insemmu wkoll il-kunfidenza, xi drabi anke żejda, li għandu bil-ballun f’saqajh. Fil-fatt, ftit tal-ġimgħat ilu, inġenwità tiegħu swiet qares lil Monaco f’logħba kontra Bordeaux. Madankollu, Subašić għandu mnaqqax taħt ismu gowl li skurja direttament minn freekick fl-2012 kontra Boulogne.

Ċertament, in-numri ta’ Danijel Subašić jixhdu li mhuwiex l-aqwa goalkeeper fid-dinja, u l-pressing aggressiv ta’ Juventus jista’ jpoġġih f’diffikultà, iżda meta jkun f’forma tajba mhux faċli tgħaddilu l-ballun u Higuaín & Co. iridu jkunu fl-aqwa tagħhom biex jisfruttaw l-attakki Juventini.

Il-klabb qed jaħseb fi proġetti li jistgħu jagħtu prominenza nazzjonali lil dawk li jipparteċipaw fihom. Għalhekk, jekk tixtieq tappoġġja lill-klabb permezz ta’ sponsor, agħmel kuntatt magħna fuq info@juventusmalta.com.

Tixtieq tkun kontributur tas-sit juventusmalta.com u tibda tikteb l-artikli magħna? Agħmel kuntatt fuq admin@juventusmalta.com