Wara r-rebħa konvinċenti kontra Bologna fl-ewwel logħba tal-2017, tkellem il-protagonista b’żewġ gowls Gonzalo Higuaín. F’intervista wara l-logħba Gonzalo Higuaín tkellem fuq il-prestazzjoni tat-tim u fuq iż-żewġ gowls li skurja.

“Ninsab kuntent ħafna bir-riżultat u bil-gowls li skurjajt. L-ewwel gowl li skurjajt kien iktar diffiċli minħabba li kelli difensur ma’ dahri u l-ballun kien ġej fl-arja.”

“It-tliet punti kienu importantissimi għaliex bir-rebħa ta’ Roma iktar qabel, id-distakk kien ta’ punt wieħed biss u għalkhemm issa għad hemm logħba differenza, kien importanti li nkabbru l-vantaġġ. L-ewwel logħba wara l-waqfa tal-Milied dejjem tkun diffiċli iżda fid-90 minuta għamilna prestazzjoni tajba ħafna fejn l-avversarji rari għamilnielhom spazji biex joħolqu l-azzjonijiet.”

“F’kull logħba li nilgħab ma’ dan it-tim, dejjem nipprova nuri li ħaqqni nilbes il-flokk ta’ Juventus. Nixtieq nagħti lura l-fiduċja li l-klabb wera fil-kapaċijiet tiegħi meta għamel minn kollox biex jakkwista l-firma tiegħi. Hija ħafna iktar faċli li tilgħab ma’ players kbar. Huwa importanti li tisma’ u titgħallem mgħand kulħadd ta’ madwarek u jien hekk qed nagħmel.”

Sors: Tutto Juve