B’4 rebħiet u 2 draws, bi 11-il goal skurjat u 2 maqlugħa, Juventus huma r-rebbieħa ta’ Group H wara nuqqas ta’ 3 snin. Fatt interessanti wkoll li Juventus huma l-aħjar difiża s’issa flimkien ma’ Atletico Madrid li qalgħu 2 goals biss rispettivament.

L-ewwel logħba ta’ dan il-grupp kienet kontra Sevilla fil-Juventus Stadium li ntemmet f’parità ta’ 0-0. F’logħba bilanċjata fejn Sevilla kienu dixxiplinati ħafna, għamluha diffiċli ħafna lil Juventus biex jiskurjaw. Fit-tieni partita tal-grupp ġewwa l-belt kapitali Kroata, Juventus iddominaw il-partita mil-bidu sal-aħħar kontra Dinamo Zagreb u rebħu l-partita bl-iskor ta’ 0-4 fejn jispikka l-goal sabiħ li skurja l-Arġentin Paulo Dybala. Fit-tielet logħba kontra Lyon fi Franza, Juventus ħarġu rebbieħa bl-iskor ta’ 0-1 wara li għamlu ħin twil ukoll bi player inqas wara t-tkeccija ta’ Lemina. Kien goal spettakolari individwali ta’ Juan Cuadrado li ġab 3 punti prezzjużi fi ground diffiċli ħafna. F’din il-logħba spikka l-goalkeeper numru 1 ta’ Juventus, San Gigi Buffon. Buffon wettaq 3 saves spettakolari fosthom ta’ penalty fejn bla dubju żamm lil Juventus fil-partita.

Fil-partita ta’ ritorn kontra Lyon fil-J Stadium Juventus iddiżappuntaw fejn wara li tilfu ħafna ċansijiet fl-aħħar minuti tal-partita sofrew il-goal tad-draw u l-partita ntemmet fi draw ta’ 1-1. F’dan l-istadju Juventus kienu jinsabu 2 punti taħt Sevilla li kienu qed jokkupaw l-ewwel post. Kien imiss il-partita li kienet se tiddetermina min se jirbaħ il-grupp fejn wara li fil-bidu Juventus kienu maħsuda b’goal kmieni, eżatt qabel spiċċat l-ewwel taqsima Claudio Marchisio ġab id-draw minn penalty. Fl-aħħar tal-partita Juventus skurjaw darbtejn oħra permezz ta’ Leonardo Bonucci u Mario Mandžukić biex b’rebħa ta’ 1-3, iċ-Champions Taljani telgħu fl-ewwel post b’punt fuq Sevilla qabel l-aħħar logħba. Finalment ilbieraħ intlagħbu l-aħħar logħbiet tal-grupp fejn Juventus rebħu l-partita kontra Dinamo Zagreb bl-iskor ta’ 2-0 u Sevilla ġew miżmuma minn Lyon fi Franza fi draw ta’ 0-0 biex b’hekk Juventus huma r-rebbieħa ta’ Group H b’14-il punt, isegwuhom Sevilla bi 11-il punt, Lyon fit-tielet post u akkwistaw post fl-Europa League bi 8 punti u fl-aħħar post mingħajr l-ebda punt hemm Dinamo Zagreb. Punt negattiv fuq dan it-team huwa li f’6 logħbiet ma’ skurjaw l-ebda goal u sofrew 15-il goal.

PRIMI! Issa nistennew nhar it-Tnejn li ġejjin biex naraw min se jkunu l-avversarji tagħna fil-fażi tal-aħħar 16 fi Frar li ġej. Fino alla fine!