Ilbieraħ 21 t’April 2017 l-urna ta’ Nyon laqqgħet lil Juventus ma’ AS Monaco FC fis-semifinali tal-UEFA Champions League. Juventus se jkunu qed jilagħbu l-ewwel partita fl-iStade Louis II fit-3 ta’ Mejju li ġej. Għad jonqos preċiżament ħdax-il ġurnata għal dan l-appuntament tant mistenni mill-partitarji Juventini kollha, fejn matulhom se nkunu qegħdin nagħtu ħarsa dettaljata lejn Monaco.

Biex nibdew din l-analiżi tajjeb inħarsu lejn il-vjaġġ tal-Franċiżi s’issa f’din l-edizzjoni taċ-Champions League, fejn wieħed jirrealizza li Monaco bdew il-mixja tagħhom lejn is-semifinali fit-tielet rawnd eliminatorju. Fil-fatt, wara li s-sena l-oħra spiċċaw il-kampjonat Franċiż fit-tielet post, Monaco kellhom jeliminaw lil Fenerbahçe u lil Villarreal biex setgħu jikkontestaw il-fażi tal-gruppi.

Fi Grupp E Monaco affrontaw lil Tottenham Hotspur FC, Bayer 04 Leverkusen u PFC CSKA Moskva. Kienu l-Franċiżi li rebħu l-grupp bi tliet rebħiet, żewġ draws u telfa, b’punt vantaġġ fuq Leverkusen. Fl-istess fażi Monaco skurjaw disa’ gowls filwaqt li qalgħu sebgħa. Fost l-iktar partiti li spikkaw kien hemm iż-żewġ rebħiet ta’ Monaco fuq Tottenham bl-iskor identiku ta’ 2-1, u d-draw li kisbu f’darhom kontra Leverkusen erba’ minuti fuq il-ħin regolamentari.

Fil-fażi tal-aħħar sittax, forsi b’sorpriża, Monaco eliminaw lil Manchester City ta’ Pep Guardiola b’aggregate ta’ sitta b’sitta iżda b’iktar gowls barra minn darhom. Il-protagonisti tal-attakk ta’ Monaco kienu Kylian Mbappé u Radamel Falcao li bejniethom skurjaw erba’ gowls fil-konfront doppju kontra s-City. Iż-żewġ attakkanti rrepetew ruħhom fil-kwarti tal-finali kontra Borussia Dortmund, fejn reġgħu skurjaw erba’ gowls kumplessivament biex Monaco eliminaw lill-Ġermaniżi b’aggregate ta’ sitta bi tlieta.

Wara dawn l-erbatax-il partita, Monaco sabu ruħhom fis-semifinali tal-akbar kompetizzjoni Ewropea għall-klabbs, pożizzjoni li ftit li xejn stennew li se jkunu qed jokkupaw. Minħabba dan, il-Franċiżi m’għandhom l-ebda pressjoni fuqhom u xejn x’jitilfu. Din hija l-ewwel raġuni fost bosta għalfejn l-ebda Juventin m’għandu jagħmel fatta l-finali ta’ Cardiff.

Il-klabb qed jaħseb fi proġetti li jistgħu jagħtu prominenza nazzjonali lil dawk li jipparteċipaw fihom. Għalhekk, jekk tixtieq tappoġġja lill-klabb permezz ta’ sponsor, agħmel kuntatt magħna fuq info@juventusmalta.com.

Tixtieq tkun kontributur tas-sit juventusmalta.com u tibda tikteb l-artikli magħna? Agħmel kuntatt fuq admin@juventusmalta.com