Il-Juventus Club Malta Cuore Bianconero rċieva komunikazzjoni mingħand Juventus li tindika tmiem Jannar bħala d-data ta’ skadenza biex wieħed jagħmel is-sħubija DOC.

Din is-sħubija hi waħda marbuta direttament ma’ Juventus, li jfisser li biha l-klabb ikollu d-dritt jagħmel talba għal biljetti direttament għand Juventus. Mingħajr din is-sħubija, membru tal-klabb ikun jista’ jakkwista l-biljetti biss mingħand aġenti.

Id-DOC tibqa’ valida sa tmiem l-istaġun u tiswa’ €25 (għall-adulti). Din is-sħubija tista’ ssir biss minn min ikollu sħubija valida mal-klabb.

Min-naħa l-oħra t-Tessera del Tifoso hi sħubija li tagħti l-opportunità lil dak li jkun biex jagħmel użu minn season tickets. Din tiswa’ €15-il u tibqa’ valida għal ħames snin. Biex din issir mal-klabb, wieħed irid ikun membru tal-klabb kif ukoll membru DOC. L-għażla l-oħra hi li dak li jkun jagħmilha għal rasu.

Dan ifisser li wara l-31 ta’ Jannar, il-klabb ikun jista’ japplika biss għat-Tessera del Tifoso f’isem persuni li jkollhom is-sħubija DOC attiva.

Il-klabb se jilqa’ l-aħħar applikazzjonijiet għas-sħubija DOC nhar il-Ħadd 27 ta’ Jannar, qabel il-logħba bejn Lazio u Juventus.

Bħalma ġara fi snin preċedenti, il-klabb ma jeskludix li d-data għas-sħubija DOC tiġi estiża. Madankollu, sakemm ikun hemm komunikazzjoni ulterjuri, id-data ta’ skadenza hi waħda finali.

Min jixtieq iktar informazzjoni għandu jibgħat email fuq tdt@juventusmalta.com.