F’intervista wara li ntemmet il-partita kontra Inter, il-midfielder ta’ Juventus Miralem Pjanić sostna li t-tliet punti mirbuħa fil-logħba kontra Inter huma validi u importantissimi fit-tkomplija għar-rebħ tal-kampjonat.

“Dawn huma tliet punti importantissimi u rbaħniehom meritatament kontra tim validu ħafna. Ninsabu sodisfatti bir-riżultat u ovvjament talli ma sofrejniex gowl. Jekk kien hemm tim li kien jistħoqqlu jirbaħ il-partita konna preċiżament aħna u bqajna niġġieldu sal-aħħar minuta biex nirbħu l-partita.”

“Kif ħrigna għall-warming up, l-għajta tas-sapporters Juventini daħlet ġo fina u mlietna b’kuraġġ kbir għall-partita u nixtiequ li fl-aħħar tal-istaġun nagħtu rigal lil dawn in-nies li kull logħba nsibuhom warajna. Preżentement ninsabu motivati ħafna għaliex qed nilagħbu logħob tajjeb, u qed noħolqu bilanċ bejn niskurjaw il-gowls u li ma nsofruhomx biex b’hekk dak il-bilanċ qed ikun fattur fil-mixja pożittiva tagħna.”

Miralem Pjanić wara tkellem ukoll dwar l-avversarji li jmiss fejn nhar l-Erbgħa li ġej Juventus se jaffrontaw lil Crotone barra minn darhom.

“Il-logħba kontra Crotone żgur mhux se tkun faċli wara battalja bħal din kontra Inter. Bħal kull logħba oħra, il-mira tagħna se jkunu t-tliet punti biex inkomplu nkabbru l-vantaġġ fuq ta’ warajna. L-iskwadra tagħna hija twila u kull plejer huwa kapaċi li jimla l-post ta’ ħaddieħor. L-iktar ħaġa importanti hi li nibqgħu għaddejin kif aħna sejrin. It-timijiet li qed isegwuna żgur mhux se jaqtgħu qalbhom, però aħna b’xi mod irridu neliminawhom mill-ġirja.”

Sors: Football Italia