minn Marlon Hili

Qatt mhu faċli li tiċċaqlaq minn post li f’dawn l-aħħar ħames snin kien lok ta’ suċċessi għall-klabb tagħna, però kif jgħidu l-Ingliżi ‘life goes on’, u fil-ħajja trid timxi maż-żminijiet mingħajr ma tħares lura.

Madwar sena ilu nibtet l-idea li bħala Kumitat nibdew infittxu post ikbar u aktar aċċessibbli, però sa dak iż-żmien kienet biss idea, jew aħjar ħolma, li maż-żmien twarrbet fuq xkaffa sabiex niffukaw fuq affarijiet iktar importanti għall-membri u Juventini Maltin.

Iżda nhar it-23 ta Frar 2016 (Juventus vs Bayern b’riżultat ta’ 2-2) kien il-fulkru ta’ fejn wasalna llum: klabb mimli daqs bajda, nies bilwieqfa, diffikultà sabiex persuna jara logħba kif suppost, u saħansitra nies jitilqu f’nofs logħba sabiex ikunu jistgħu jaraw il-logħba f’aktar kumdità.  Mhux sitwazzjoni sabiħa għal klabb li l-motto tiegħu dejjem kien ‘IL-KLABB MILL-MEMBRU GĦALL-MEMBRU’. Kien għalhekk li wara dakinhar erġajna qbadna l-ħolma tagħna minn fuq l-ixkaffa u bdew it-taħditiet sakemm b’vot unanimu bdiet issir tfittxija għal post ġdid.

Saru diversi studji dwar din l-għażla fosthom dwar il-lokalità, parkeġġ, ambjent u ovvjament (u l-aktar importanti) il-finanzi li wieħed jirrikjedi sabiex il-post jaqdi l-bżonnijiet tagħna. Nista’ nassigurakom li l-għażla ma kinitx faċli.

Wara diversi tfittxijiet ġie identifikat il-post tal-famuża ‘I’M IN LOVE’ – il-frażi li lissint mal-ewwel darba li rajt ritratti tal-post ġdid, meta dakinhar kien għadu ġebel u saqaf. Post fil-Marsa, viċin ta’ stabbilimenti kbar f’pajjiżna u apparti minn hekk f’żona ċentrali, mingħajr problema ta’ parkeġġ, mingħajr residenzi fil-viċin u aktar minn hekk, fil-qalba ta’ proġett innovattiv li għandu jwassal għat-tlestija tal-Villaġġ tal-Karnival li se jkun eżattament quddiem il-binja tal-kwartieri l-ġodda fil-Marsa.

Kien hawn li saret laqgħa tal-Kumitat b’urġenza, ittieħed vot unanimu u l-ħolma uffiċjalment saret realtà. Ovvjament ix-xogħol ma waqafx hemm. Mill-għada stess bdew it-taħditiet ma’ sid il-binja u sussegwentement bdiet il-ħidma fil-binja l-ġdida.

Bl-għajnuna ta’ Mark Zahra, li fil-professjoni tiegħu barra mill-klabb hu wkoll Project Manager, bl-ideat innovattivi ta’ Gabriel Zammit, magħqudin mal-ideat ta’ kulħadd (inkluż membri tagħna stess) beda l-ippjanar tas-sede, biex il-klabb ħa l-forma li l-membri llum qed igawdu.

Illum wieħed isib l-uffiċċju tal-aġenzija tal-ivvjaġġar (l-ewwel aġenzija li bil-permessi kollha meħtieġa topera f’isem Supporters Club), bar kbir u professjonali, kċina enormi, Games Room, Board Room għall-membri tal-Kumitat u apparti minn hekk kmamar tal-banju li jaqdu l-bżonnijiet ta’ kull persuna ta’ kull età li tattendi l-klabb.

Wara t-tqassim tal-post u wara li tlesta x-xogħol kollu (bħall-madum, żebgħa, dwal, eċċ.) beda minnufih ix-xogħol sabiex jitwaħħal l-apparat (bħal televisions, sound, dwal, eċċ.) u dan kollu seta’ jsir bis-saħħa ta’ Paul Valletta, persuna b’esperjenza vasta ħafna fejn jidħol dan ix-xogħol u rinomata sew f’pajjiżna għal dan ix-xogħol. Ir-riżultat hu prova ċara ta’ dan!

Dan ix-xogħol kollu wassal biex illum għandna post addattat għal klabb li sal-lum igawdi t-titlu tal-ikbar klabb barrani fid-dinja, u min jaf x’se jkompli jsarrfilna l-futur.

Grazzi kbira tmur speċjalment lill-isponsors li għenu mhux ftit sabiex din il-ħolma setgħet issir realtà u li ovvjament emmnu bis-sħiħ fil-proġett ambizzjuż tagħna, però ma nistax ninsa l-ħidma bla waqfien tal-membri kollha tal-Kumitat (inkluż il-familji tagħna) li matul dan iż-żmien appoġġjawna avolja l-ħin tagħna magħhom kien limitat. Grazzi kbira tmur ukoll għal dawk il-membri li għenu fix-xogħol u dawk li wara l-ftuħ uffiċjali laqgħu l-istedina tagħna b’attendenza kbira u impressjonanti.