It-tim ta’ Juventus, immexxi mill-eksplejer Fabio Grosso, kompla bil-mixja prestiġġjuża tiegħu fit-turnew ta’ Viareggio hekk kif għeleb lit-tim ta’ Bologna bl-iskor ta’ 3-1, biex aċċerta ruħu minn post fis-semifinali ta’ din il-kompetizzjoni. Huma se jkunu qegħdin jaffrontaw lit-tim ta’ Spezia, hekk kif dan tal-aħħar għeleb lir-rivali tal-istess Juventus, Torino, bl-iskor ta’ 2-1.

Mingħajr dubju ta’ xejn, il-protagonist fl-ewwel taqsima kien Didiba hekk kif b’doppjetta min-naħa tiegħu, daħħal lit-tim ta’ Juventus b’żewġ gowls vantaġġ fil-ħin tal-mistrieħ. Kienu 45 minuta totalment dominata minn Juventus, li minkejja kienu mingħajr il-kaptin Luca Clemenza, xorta waħda dehru tim kunfidenti u wrew li kapaċi jikkompetu għal dan it-trofew.

Wara erba’ minuti, Didiba fetaħ l-iskor b’daqqa ta’ ras wara kross minn Pol Lirola. Wara dan il-gowl, it-tim ta’ Bologna beda joħroġ ftit ftit minn ġo qoxortu u kellu c-ċans li jġib id-dro f’numru ta’ okkażjonijiet, fejn iżda sabu lill-gowler Del Favero ppreparat għal kull tentattiv.

Ftit qabel tmiem l-ewwel taqsima, Didiba għamilhom 2-0 hekk kif approfitta minn ħarġa xejn tajba tal-gowler tal-Bologna, bil-plejer Juventin jixħet għal ġewwa bir-ras.

Bologna naqqsu d-distakk fil-bidu tat-tieni taqsima, meta b’lob sabiħ, Souare għamilhom 2-1 u tefa’ l-pressjoni fuq it-tim ta’ Juventus.

Madankollu, ftit tal-minuti wara, Juventus reġgħu kabbru l-vantaġġ tagħhom hekk kif permezz ta’ frikik stupend, Di Massimo għamilhom 3-1, waqt li ddedika dan il-gowl lill-kaptin Luca Clemenza li sfortunatament l-istaġun tiegħu ġie mitmum wara l-injury li sofra jumejn ilu kontra Milan.

B’dan il-gowl, it-tim ta’ Juventus aċċerta ruħu mir-rebħa u minn post fis-semifinali kontra Spezia.