Wara li telaqna Pogba, issa jmiss li Marotta jberbaq naqra flus għal żewġ plejers oħra li kapaċi jkopru kważi kważi l-istess rwol ta’ Paul. Ovvjament li nsibu stilla bħal Pogba f’dan il-mument huwa impossibli però ma niqfux hawn. Gianluca di Marzio qed isemmi li Juventus huma wara Matić, Witsel, Gustavo u Matuidi.

Matić: Statura enormi, plejer tajjeb ħafna difensivament u kapaċi wkoll fl-attakk. L-iżvantaġġ huwa biss li Conte ma jridx iħallih jitlaq minn ma’ Chelsea.

Witsel: Plejer kreattivament tajjeb ħafna, bil-għaqal bil-ballun f’saqajh però ilu ħafna snin jilgħab fir-Russja u dan huwa żvantaġġ importanti speċjalment għaċ-ċifra li qed tintalab għalih, dik ta €25 miljun.

Luis Gustavo: Plejer li difensivament huwa tajjeb ħafna, kapaċi jkisser u jwaqqaf ħafna blalen f’nofs il-grawnd. Bravu wkoll fil-fażi offensiva u versatili ħafna fl-irwoli f’nofs il-grawnd. Kien issemma ħafna li jingħaqad ma’ Real Madrid, qabel dawn tal-aħħar xtraw lil Casemiro. Żvantaġġ li l-Wolfsburg iridu somma kemxejn għolja għalih, kif ukoll qed jissemma li jitlaq Zaza, li fl-opinjoni tiegħi jaf tkun deċiżjoni żbaljata.

Matuidi: Qed nisma’ ħafna kummenti kontra Matuidi u naħseb li qed inkunu inġusti miegħu għaliex nemmen li huwa plejer ta’ kalibru importanti anke jekk forsi għandu 29 sena. Ma’ PSG huwa plejer importanti ħafna, huwa plejer li jilgħab kull rwol f’nofs il-grawnd, tajjeb immens kemm difensivament, kif ukoll offensivament. Plejer li ma jieqaf jiġri qatt għall-ballun. L-unika żvanaġġ huwa li ilu l-karriera kollha jilgħab fi Franza, li għal ħafna huwa kampjonat irrelevanti.

Apparti dawn jien nemmen li Asamoah għandu jibqa’ ma’ Juventus, anke wara l-preseason tajjeb li kellu. Ovvjament kollha nafu d-difetti ta’ Asamoah imma huwa versatili immens li kapaċi jaqdina wkoll fl-irwol ta’ Pogba.

Nirrepeti u ngħid li dawn li ktibt dwarhom mhumiex stilel daqs Pogba, però nemmen li kapaċi jintegraw tajjeb fl-iskwadra ta’ Juventus u s-sena d-dieħla nagħmlu pass ’il quddiem anke fiċ-Champions League.

[playbuzz-item url=”//www.playbuzz.com/juventusmalta10/liem-plejer-hu-l-ideali-g-all-midfield-ta-juventus”]